ကျန်ခဲ့တာလား၊ ချန်ခဲ့တာလား

ကိုယ့်ကို စကားလုံးတွေ အများကြီး ဖြစ်စေခဲ့တဲ့ လူတစ်ယောက်က
တိတ်ဆိတ်သွားအောင် လုပ်နိုင်လိမ့်မယ်လို့ မတွေးမိခဲ့သလို
အပြုံးတွေ အများကြီး ပွင့်စေခဲ့တဲ့ လူတစ်ယောက်က
မျက်ရည်တွေလည်း ဖန်တီးနိုင်တယ်လို့ စဉ်းစားမိပါ့မလား။

အရုပ်တစ်ရုပ်ကို အသက်သွင်းတတ်တဲ့သူက
သတ်နည်းလည်း သိတယ်။
ဘယ်ရုပ်သေးရုပ်မှ တကယ် ကတတ်ဖို့ မလိုဘူး။
ပညာသည်တစ်ယောက်ရဲ့ ကြိုးဆွဲရာအောက်မှာ
အားလုံးဟာ အစီစဉ်တကျ … လှတယ်။

အရှိန်နဲ့ သွားနေတဲ့ အဝေးပြေးကား တစ်စီးပေါ်မှာ
အရှုံးသမား တစ်ယောက် ရှိတယ်။

ကားမှန်ပြုတင်းပေါက်ကနေတစ်ဆင့်
ငှက်ကလေးတွေ ပျံသွားတာ မြင်တဲ့အခါ
ကိုယ်ဟာ ကျန်ရစ်ခဲ့တဲ့ လူတစ်ယောက်လား….။

ဤမြို့မှ ကြိုဆိုပါ၏ ဆိုင်းဘုတ်က
တဖြည်းဖြည်း အနောက်မှာ ကျန်နေခဲ့တယ်။
ဒီလိုဆိုတော့လည်း … ကိုယ်ဟာ ရာထူးတက်ပြီး
နှုတ်ဆက်ခဲ့သူ တစ်ယောက်များ ဖြစ်သွားမလား။

ကြံဖန် ဖြေသိမ့်နေရတဲ့ ဘဝမျိုးက
ဒဏ်ရာတော့ အပြည့်ပဲ …။

ချစ်ခြင်းများစွာဖြင့်
တိုးတက်အောင်(ပဲခူး)